Kalaallit Nunaanni saammaateqatigiinnissaq sunaava

Kalaallit Nunaanni saammaateqatigiinnissamut isumalioqatigiissitaq saammaateqatigiinnerup imatut nassuiarnera aallaavigalugu sulissaaq:

"Saammaateqatigiinneq piffissap ingerlanerani angujartuaarneqartussaavoq, taanna aqqutigalugu inooqatigiinnermi ullutsinni ajornartorsiutaasut paasisimalerneranni, inuiaqatigiit kalaallit eqqarsartaaseq nunasiaataanerup oqaluttuassartaata malitsigisaanik attanneqartoq qimallugu ingerlariaqqissallutik. Saammaateqatigiinnermut suliap ingerlanera inuiaqatigiinnut kalaallinut ataatsimoorussamik siunissaqalernissamut– nunami sumiiffiit, kinguaariiaat, ataatsimoortukkaat inuillu ataasiakkaat akimorlugit – inissaqartitsilissaaq. Taamaattumik saammaateqatigiinnissamut isumalioqatigiissitaq innuttaasut oqaluttuarisaat tunngavigalugit akaareqatigiinnissamut, ataqqeqatigiinnissamut aammalu akimmiffiusunit kaanngartitsinissamut iliuusissanut killisalersuilluni sinaakkutissiissaaq."

Saammaateqatigiinneq pingaarnertigut piffissap ingerlanerani angujartuaarneqartussaavoq, tassani ilaallutik:

  • Oqaluttuarisaaneq taassumalu maannakkut pisunut sunniinera pillugu paasisimannilernissaq.
  • Ataatsimoorluni siunissamut ingerlaqqinniarluni pereersut paasinissaat.
  • Inuiaqatigiinni allanngoriartornissamut piffissap sivisuumik ingerlanissaa.
  • Attassuteqaatit inerisar(qqin)nissaat.
  • Pereersut eqqaamanerisa ilinniarfiginerisalu akueriniarnerinut piffissap ingerlanissaa.
  • Akuersineq akuersaarnerlu.
  • Kaanngartitsineq.
  • Saammaateqatigiinneq siunnerfiuvoq aammalu piffissap ingerlanerani angujartuaarneqartussaalluni.