Qulaajaaneq

Kalaallit Nunaanni saammaateqatigiinnissamut isumalioqatigiissitap inuiaqatigiinni kulturikkut inuiaqatigiittutullu unammilligassat, nunasiaanermit kingornutat malitsigisaannik akerleriissutaalersartut suuneri paasiniassavaat. Tamatumunnga isiginneriaatsit pingaarnerit marluk aallaavigalugit tunaartaqartumik isumalioqatigiissitaq suliaqassaaq:

  1. Nunatsinni inooqatigiinnermi ajornartorsiutaasut.
  2. Nunatsinni kiisalu Nunatta Danmarkillu akornanni oqaluttuarisaarnermi ineriartorneq aammalu kulturikkut sunniuteqaqatigiinnerit.

Suliakkiissutit allassimaffianni tikkuarneqarmat, saammaateqatigiinnermut suliap ingerlanera, inuiaqatigiinni pissutsit pillugit ilisimasat aamma innuttaasut akornanni paasinninnerup annertunerulernissaanut iluaqutaassasoq, oqaluttuarisaanerup paasiniarnissaa innuttaasut namminneerlutik oqaluttuarlutik oqaluttuaannik katersinermik ataqatigiissinneqassasoq, saammaateqatigiinnissamut isumalioqatigiissitap toqqarpaa. Inooqatigiinnermi piorsarsimassutsimilu aallaaviusut, inuit qanoq nassuiaanerminnik, eqqaamasaqarnerminnik pisunillu takorluuinerminnik ilusiliinerini pingaaruteqarput. Taamaalilluni Kalaallit Nunaanni saammaateqatigiinnermut suliap ingerlanerani, oqaluttuarisaanerup piorsarsimassutsillu paasisimanerulernerani, ilaatigut innuttaasut eqimattakkuutaat assigiinngitsut imminnut atassuteqarnerisa pitsaanerulersinneqarnissaa siunertarineqarpoq. Tamanna immikkoortut pingasut aqqutigalugit pisinnaavoq:

  1. Pereersut paasisimalernerat.
  2. Maannakkut pisunut akisussaaffimmik tigusineq.
  3. Siunissaq pitsaanerusoq qulakkeerniarlugu suleqatigiinneq.

Pereersut pillugit isumaqatigiinnginnerup imaluunniit assigiinngitsumik paasinninnerup, saammaateqatigiinnissamut suliap ingerlanerani suliaqarneq ajornakusuulersissinnaavaat. Taamaattumik inuit oqaluttuaat, eqqaamasaat maannakkullu misigisartagaat tusarnaassallugit saammaateqatigiinnissamut isumalioqatigiissitamut pingaaruteqarpoq, taamaalilluni taakkua sammisap oqaluttuarisaaneranik misissuinernik aamma inuiaqatigiinnut tunngasunik misissuinernik suliaqarnernut ingiaqatigitillugit oqaluttuarineqassallutik. Oqaluttuarisaanermut assigiinngitsumik isiginninnerit imminnut tapertariisinneqarsinnaapput, taamatullu ingerlatitsineq, qanoq pereersut innuttaasut assigiinngitsumik kinaassuseqarnerannit ilusilerneqartarnersut aammalu ilusilerneqarsimanersut, inuiaqatigiinni ilaasut tamarmik paasinninnissamut periarfissaqarnerannik inerneqarsinnaavoq.