Suna pillugu aammalu kimut saammaateqatigiinnissaq

Nunasiaataaneq kiisalu Kalaallit Nunaanni ineriartortitsineq qanoq misigineqarsimanersoq aammalu piffissani sumiiffinnilu assigiinngitsuni kiisalu kinguaariiaat, eqimattakkuutaat aamma inuinnaat ataasiakkaat akimorlugit qanoq suli misigineqarnersoq pillugu naleqartitanut tunngaviusoq aallaavigalugu Isumalioqatigiissitaq sulivoq. Tunngaviusumik eqqarsartaaseq taanna aallaavigalugu isumalioqatigiissitap ilisimavaa, saammaateqatigiinnissamut pisariaqartitsineq assigiinngitsuussasoq, taamatullu innuttaasut tamatumunnga pisariaqartitsillutik misigisimanngitsunik ilaqarsinnaallutik.

Taamaattumik siunissami innuttaasut akornanni akuersaarnerulernissaq anguniarlugu, innuttaasut akornanni paasinninnerulernissaq aammalu nammineq aallaavigisap eqqumaffiginerulernissaa anguniarlugu suliap ingerlanera aallartinneqartussaammat, eqimattakkuutaat assigiinngitsut assigiinngitsumik misigissuseqarnerat, kinaassuseqarnerat aammalu pisunut pisariaqartitsinerat akimorlugit assigiinngitsumik ”eqqaamasaqartoqartoq” aallaavigissallugu pingaaruteqarpoq.

Kalaallit Nunaata iluani saammaateqatigiinnermut tunngatillugu, saammaateqateqarsinnaaneq aamma saammaateqatigiinneq akornatsinni pisinnaasoq aallaavigineqarpoq. Taamaattumik isumalioqatigiissitaq sammiviit tunngaviusut sisamat aallaavigalugit sulivoq:

  1. Imminut namminerlu tunuliaquttamik saammaanneq
  2. Qanga pisimasunik akuerinninneq
  3. Nunatsinni inuit akornanni akuerinninneq
  4. Kinguaariiaat akornanni akuerinninneq

Saammaateqatigiinneq qanoq iluseqartoq pissanersoq inuiaqatigiinni eqimattakkuutaat assigiinngitsut isumaqatigiissutigisinnaappassuk, saammaateqatigiinneq pisinnaavoq. Taamaattumik suliassaqarfiit saammaateqatigiinnermut suliap ingerlanerpiaanut tunngaviliisinnaasut paasinarsisinnissaat saammaateqatigiinnissamut isumalioqatigiissitamut pingaaruteqarpoq.