Sooq saammaateqatigiinniartoqassava

Kalaallit Nunaanni saammaateqatigiinnissamut isumalioqatigiissitamik aallartitsinermut tunngaviusoq, Kalaallit Nunaata siusinnerusukkut nunasiaataasimanera eqqarsaatigalugu isigineqassaaq, tassani naatsorsuutigineqarluni inuiaqatigiit ineriartornerat eqqarsartaatsimik nunasiaataanerup oqaluttuassartaata toqqaannartumik malitsigisaanik attanneqartumik, annertuumik sunnerneqarsimasoq, aammalu inuiannut inuiaqatigiinnilu ineriartornermut sunniisimalluni. Suliakkiissutit allassimaffiisa aallaqqaataani allassimavoq

"Pitsaasumik ineriartornissamut tunniusseqataanissamut inuiaqatigiit kalaallit ataatsimoorlutik akisussaaffeqarput. Inuiaqatigiinni assigiinngisitaartunik innuttalimmi innuttaasut ukiut ingerlanerini pisunit, oqaluttuarisaanermi iliuuserisanit aalajangiinernillu eqqaamasaat isumaallu assigiinngitsut ataqqineqassapput. Pissutsit tamakku oqallisigissallugit ullutsinnilu inuiaqatigiinni pissutsinut pingaaruteqartuuneri kiisalu innuttaasut inuunerminni atugarisaannut pingaaruteqarnerisa paasinartunngortinnissaat pingaartuuvoq - inuup immikkut nammineq aamma inuiaqatigiit kalaallit imminnut ataqqinninnerinut iluaqutaasumik".

Taamaattumik saammaateqatigiinnissamut isumalioqatigiissitamik aallartitsinissamut tunngaviusoq tassaavoq, saammaateqatigiinnissamut suliaq aqqutigalugu inuiaqatigiinni pissutsit pillugit ilisimasat aammalu innuttaasut akornanni paasinninnerup annertunerulernissaanut iluaqusiinissamik kissaateqarneq, aammalu nammineq aallaavigisap paasisimanerulernera inuiaqatigiinni akuutitsisunik ataqqinassuseqartunillu aammalu toqqissisimanartumik ineriartortitsinissamut pitsaanerusunik periarfissaqartitsilissasoq.