Kalaallit Nunaanni saammaateqatigiinnissamut Isumalioqatigiissitaq

Nunat allat pissusiviusunut saammaateqatigiinnissamullu isumalioqatigiissitaannit misilittakkat aammalu oqaluttuarisaanermi saammaateqatigiinnissamut isumalioqatigiissitaasartut paasinarsisippaat, inuiaqatigiit kikkulluunniit saammaateqatigiinnissap tungaanut namminneerlutik aqqutissartik nassuiartariaqaraat. Tamanna taamatuttaaq Kalaallit Nunaanni toqqarneqarpoq. Taamaattumik Kalaallit Nunaanni saammaateqatigiinnissamut isumalioqatigiissitaq, isumalioqatigiissitanut assingusunut nunani tamalaani ingerlasimasunut ingerlasunullu toqqaannartumik saniliunneqarsinnaanngilaq.

Kalaallit Nunaata oqaluttuarisaanera, ineriartornera aammalu ullumikkut inuiaqatigiit immikkut oqaluttuassartaqarput aammalu toqqaannartumik nunanut allanut sanilliunneqarsinnaanatik. Taamaattumik Kalaallit Nunaanni saammaateqatigiinnermut tunngaviusoq tamanna eqqarsaatigalugu isiginiarneqassaaq. Saammaateqatigiinnissamut isumalioqatigiissitaq nunap iluani saammaateqatigiinnermut suliap ingerlanissaa pillugu sinaakkusiussat aallaavigalugit sulivoq, tassani qitiutinneqarluni, Kalaallit Nunaanni innuttaasut ineriartornerup ingerlanerani naligiinngitsunik misigisaqarsimanerat; inooqatigiinnermi, piorsarsimassutsimi aamma aningaasaqarnikkut.

Isumalioqatigiissitanit ukiut 40-it kingulliit nunarsuarmi ingerlasimasunit amerlanernit allaanerussutaasoq tassaavoq, Kalaallit Nunaanni saammaateqatigiinnissamut isumalioqatigiissitaq tassaanngimmat ilumoortunut isumalioqatigiissitaq. Pissusiviusunut isumalioqatigiissitaq amerlanertigut assersuutigalugu taarsiissuteqarnissamik piumasaqaateqarnissaq utoqqatsertoqarnissaalu siunertaralugit sulisarpoq. Ilumoortunut isumalioqatigiissitat ataatsimut isigalugu politikkikkut allanngortoqarneranut atatillugu pilersinneqartarput, sorsuttoqareernerata kingorna imaluunniit sukangasumik naalakkersuinermit oqartussaaqatigiinnermut ikaarsaarnermi kiisalu unioqqutitsinerit aalajangersimasut piffissap ingerlanerani pisarsimasut misissorniarlugit.

Kalaallit Nunaanni ilumoortunut aamma saammaateqatigiinnissamut isumalioqatigiissitat tusaamaneqarnerupput. Amerlanertigut tusagassiuutini assersuutigalugu Canadamit aamma Afrikamit kujallermit pissusiviusunut aamma saammaateqatigiinnissamut isumalioqatigiissitanit oqaluttuarineqartut saqqummiunneqartarsimapput. Taamaattumik aamma Kalaallit Nunaanni isumalioqatigiissitaq taakkunatut iluseqartoq aammalu taakkunatut siunertaqassasoq isumaqartoqarsimassappat tamanna tupaallannartuunngilaq. Taamaattoq Kalaallit Nunaanni saammaateqatigiinnissamut isumalioqatigiissitaq nunat allat isumalioqatigiissitaliaannit toqqaannartumik assiliinerunngilaq. Kalaallit Nunaanni saammaateqatigiinnissamut isumalioqatigiissitaq ilusimini ”oqaluttuarisaanermut isumalioqatigiissitamut” (Historical commission”) eqqaanarneruvoq, kisianni nunarsuarmi ”oqaluttuarisaanermi saammaateqatigiinnissamut isumalioqatigiissitat” ilaasa piumasaqaatigisimasaattut utoqqatsertoqarnissaa imaluunniit eqqartuussivik aqqutigalugu piumasaqaateqarnissaq piumasaqaatigineqanngimmat allaassutigalugu.

 

 

Nunani tamalaani ilumoortunut aamma saammaateqatigiinnissamut isumalioqatigiissitat

     oqaluttuarisaanerat