Saammaateqatigiinnissamut isumalioqatigiissitap ukiuni pingasuni suliassaani suliakkiissutit allassimaffiat aallaavigineqarpoq. Suliakkiissutit allassimaffiat aallaavigalugu isumalioqatigiissitap pingaarnertut periusissaq aalajangersarpaa, taannalu suliassamut tunngatillugu killissaliissaaq. Isumalioqatigiissitap nammineq pingaartitanut tunngavissani aalajangersarpaa, suliaqarnissani killissalersorlugu, aammalu suliaqarnermini tunngaviusussat nassuiarlugit:

Naleqartitanut tunngaviusussat

Saammaateqatigiinnissamut isumalioqatigiissitap naleqartitanut tunngavigisaanni, kikkut tamarmik peqataatinneqarnissaat, aammalu nunasiaataanerup ataqatigiinnera qanoq misigineqarsimanersoq sulilu sumiiffinni assigiinngitsuni kiisalu kinguaariit, eqimattakkuutaat inuillu ataasiakkaat akimorlugit, misigineqarnersoq assigiinngissuteqartoq, aallaavigineqarpoq.

Suliassap killissalersorneqarnera tassaavoq, Kalaallit Nunaata iluani saammaateqatigiinnerup ingerlanissaa aallunneqassasoq, saammaateqatigiinnissamut isumalioqatigiissitaasoq aammalu ilumoortunut isumalioqatigiissitaanngitsoq, taamaalillunilu nunat allat ilumoortunut aamma saammaateqatigiinnissamut isumalioqatigiissitaannik ilaarsinerunngitsoq (tamanna pillugu annertunerusumik atuaruk ’saammaateqatigiinneq sunaava’ ataani). Isumalioqatigiissitap sulinera suliassat suliarineqarnissaannut, piffissamut aningaasaliissutinullu killissaliussanut killilerneqarpoq.

Saammaateqatigiinnissamut isumalioqatigiissitap Kalaallit Nunaata iluani saammaateqatigiinnerup ingerlanissaanut aallaavigisaani, suliaqarnermut tunngaviusussat matuma kinguliani allassimasut, tunngaviusumik aallaaviusussanik sisamanik suliaqarfiusussat, aallaavigineqarput:

  1. Imminut namminerlu tunuliaqutarisanut saammaateqatigiinneq
  2. Nammineq oqaluttuarisaanermut saammaateqatigiinneq
  3. Inuiaqatigiinni kalaallini eqimattat akornanni saammaateqatigiinneq
  4. Kinguaariit akornanni saammaateqatigiinneq

 

Ingerlanissamut pilersaarut