Saammaateqatigiinnissamut Isumalioqatigiissitap suliassai

Saammaateqatigiinnissamut Isumalioqatigiissitap Ilulissani siullermeerluni suliaqarluni ataatsimiinnermini suliassat suliakkiissummi allassimasut aallartippai. Tunngaviusussat pingaarnerit siulliit aalajangiunneqarput.

Nunasiaataaneq qanoq misigineqarsimanersoq aammalu piffissani sumiiffinnilu assigiinngitsuni kiisalu kinguaariiaat, eqimattakkuutaat aamma inuinnaat ataasiakkaat akimorlugit qanoq suli misigineqarnersoq pillugu tunngaviusoq aallaavigalugu Isumalioqatigiissitaq sulissaaq.

Siunnerfigineqarpoq saammaateqatigiinneq oqaluttuarisaanitsinnut imminnut atasunut paasisaqarnersunissamut paasisimasaqarnerunissamullu iluaqutaassasoq aammalu nutaami nassuerutiginninnissanut ammaassissasoq aammalu siunissami pisartussanut aqqusaagassanut aqqutissanullu aqqutissiuissasoq.

Saammaateqatigiinnissamut suliaqarnerup ilaatut nunasiaanertut oqaluttuarisaanerup siornatigut maannakkullu pisartut isiginiarlugit oqaluttuarineqarnissaa, tusarnaarneqarnissaa akuerineqarnissaalu pingaaruteqarpoq.

Nunasiaataanertut inissisimaneq kiisalu uagut nammineerluta taassuminnga ingerlateqqiinerput inuiaqatigiinni inooqatigiinnikkut attaveqatigiinnernut sunniuteqarsimavoq, inuiaqatigiinni eqimattakkuutaa akornanni akaareqatigiinnginnermik malitseqarsimalluni.

Inuiaqatigiinni kalaallini eqimattakkuutaat assigiinngitsut akornanni naalarulunnerit takussaanngitsut assersuutissatut taaneqarsinnaapput, innuttaasut qanimut oqaloqatigalugit siunissami aaqqiivigisassavut, Isumalioqatigiissitami oqarput.

- Taammaattumik Isumalioqatigiissitap siunertaraa saammaateqatigiinnissamut iliuusissanik nuna tamakkerlugu suliniutissanik pilersitsinissaq. Suliniutitut aalajangersimasutut siullertut nunatsinni innuttaasut tamarmik akuutinneqassapput, taakkua sulinissami aallartinneqartussanngortumi suut ilaatinneqassanersut siunnersuutiminni naatsorsuutigisaminnillu ilanngussisinnaassallutik.

Isummersuutit sapinngisamik amerlanerpaat Isumalioqatigiissitap siunissami sulinerani ilaatissinnajumallugit innuttaasut akornanni atituumik misissuineq aallartinneqassaaq.