Kangiata kitaatalu saammaateqatigiinnissaat pisariaqartinneqarpoq

"Saammaateqatigiinnissap pisariaqartinneqavinneranik toqqaassagutta Kalaallit Nunaanni kangiamiut kitaamiullu saammaateqatigiittariaqarput" Saammaateqatigiinnissamut Isumalioqatigiissitap sapaatiummat Tasiilami paasissutisseeqatigiinniarluni ataatsimiititsineranit taamatut oqariartuuteqartoqarpoq.

Siullermeerluni nalinginnaasumik ataatsimiinneq

Oktobarip qulingiluaanniit 14-iannut Saammaateqatigiinnissamut Isumalioqatigiissitaq Tasiilami siullermeerluni nalinginnaasumik ataatsimiippoq.

Ataatsimiinnerup sumiiffissaa toqqarneqarpoq najukkami innuttaasut sulinermut peqataatissinnaajumallugit aamma Nunatta Kangianut soqutiginninneq takutinniarlugu.

Ullut ataatsimiiffiusut atorneqarput suliassat siulliit isumalioqatigiissitap aallartikkusutai paasiniarlugit Tasiilamiillu isumalioqatigiissitamut atugassanngorlugit oqaatigiumaneqartut katersorniarlugit.

Paasissutisseeqatigiinniarluni ataatsimiinneq ornigarneqarluartoq

Katersortarfimmi paasissutisseeqatigiinniarluni ataatsimiinnermut inuit 40-50-it ornigupput.

Ataatsimiinnermi pingaartumik siunertaavoq inuit saammaateqatigiinnermut isummersimanerisa eqqarsaataasalu tusarneqarnissaat.

Ataatsimiinnermit inerniliisoqarpoq Tasiilarmiut isumaqartut maani Kalaallit Nunaanni kangiamiut kitaamiullu saammaateqatigiilerniarnermik aallartitsinissaat assorsuaq pisariaqartinneqartoq.

Kalaallit Nunaanni kangiamiut amerlaqisut Kalaallit Nunaanni kitaamiunit naliginngisatut oqartussaassuseqanngitsutullu pissusilersorfigineqartarlutik misigisimasarput.

Kissaatigineqarportaaq kangiamiut oqaasii kitaamiut oqaasiisulli oqaatsitut akuerineqassasut.

Isumalioqatigiissitap suliassaa siulleq

Isumalioqatigiissitap misilittagarineqalersut aallaavigalugit aalajangerpoq Tasiilami saammaateqatigiinnissamik suliniummik aallartitsiniarluni.

- Tasiilamiinnitsigut sulinitsinni aallaavigisassatsinnik pitsaasunik atortussaqalerpugut, tamaanilu najugallit suleqatigiinnik aallartitsipput saammaateqatigiinnermik sulissutiginneqqittussanik, saammaateqatigiinnissamut isumalioqatigiissitamut ilaasortaq Ida Mathiassen oqarpoq.

Suleriaqqinnissaq

Saammaateqatigiinnissamut Isumalioqatigiissitaq 2015-imi januaarip qiteqqunnerani Nuummi tullianik ataatsimiissaaq. Ataatsimiinnissami suliassatut siunnersuutit arlallit isummerfigineqassapput.

Saammaateqatigiinnissamut Isumalioqatigiissitaq 2017-ip naanissaata tungaasut sulissaaq.