Isumalioqatigiissitaq aallartilluartoq

Saammaasseqatigiinnissamut Isumalioqatigiissitami ilaasortat nutaat tikkuarneqarnerisa kingorna ataatsimiinnerminni siullermi Jens Heinrich siulittaasup tulliattut toqqarneqarpoq.

”Jens Heinrich isumalioqatigiissitap pilersinneqarneranniilli ilaasortaavoq isumalioqatigiissitamilu ilaasortatut aqutsisutut atuussimalluni. Jensi Kalaallit Nunaata oqaluttuarisaaneranik annertuumik ilisimasaqarpoq aamma oqaluttuarisaaneq pillugu ilinniarsimasutut ilisimatusarsimasutullu piginnaaneqarpoq isumalioqatigiissitap sulineranut assut iluaqqutaasussanik. Siulittaasup tullianik qinersineq tamatta nuannaarutigeqaarput, aamma isumalioqatigiissitap sulinermik ingerlatsinissaanut suleqatiginissaannullu qilanaarpugut.

Isumalioqatigiissitami ilaasortat nutaat toqqarneqareernerisa kingorna isumalioqatigiissitap ataatsimiinnera siulleq angusaqarfiulluarpoq. Ilaatigut politikki aallaavigalugu malinnaasooqatigiit ataatsimeeqatigaavut, isumaliutissanik pitsaasunik tunniussaqarput aamma isumalioqatigiissitap suliamik ingerlatseqqinnissaanut tapersersuinermik ersersitsipput. Tassunga ilanngullugu suliffeqarfinnik naapertuuttunik oqaloqatigiittarnissamik siunertaqarluta ataatsimiinnerit siulliit ingerlappavut angujumallugu isumalioqatigiissitap sammisai assigiinngitsut pillugit isummersoqatigiittarnissaq suleqatigiinnermullu periarfissaasinnaasunik pilersitserusunneq. Tullissaannik ataatsimiinissatsinnut allat aggersarnissaat takorloorparput ataatsimiinnerlu tulleq ukiumi nutaami januaarip naanerani pissaaq”, Josef Therkildsen oqarpoq.

 

Attavissaq:

Allattoqarfik

Mari Kleist

email: marh@nanoq.gl

oqarasuaat: 53 78 28