Innuttaasut nipaat salliutinneqassapput

Saammaateqatigiinnissamut Isumalioqatigiissitaq nunatta avannaani, qeqqani, kujataani kangianilu innuttaasunik ataatsimiisitsisaqattaarnikuuvoq isumalioqatigiissitaq pilersinneqarmalli.

Isumalioqatigiissitaq innuttaasunik oqaloqateqarluni naapeqateqartarnermini isummanik oqaluttuanillu ataasiakkaanik katersinikuuvoq. Katersat inuiaqatigiit iluanni pissutsit ileqqullu assigiinngitsut atuuttut imarai, minnerunngitsumillu saammaateqatigiinnissap ingerlaneranut tunngasoq, isumalioqatigiissitap sulinermini atorumaagassaa.

“Inuiaqatigiit qanimut oqaloqatiginissaat pingaartipparput. Pissutsinik assigiinngitsunik ilisimasaqarnerulersitsinissaq peqataaffigissavarput aammalu inuiaqatigiit akornanni paaseqatigiinnerulersitsinissaq, amerlanerpaat tusaaneqartutut peqataatinneqartutullu misigisimaniassammata.

Innuttaasunik naapeqateqarnikkut oqaloqateqaqattaarnitsinni isumalioqatigiissitami suliarput saqqummiuttarsimavarput aammalu innuttaasut oqaluttuaannik isumaanillu annertuumik katersisimalluta. Tamaat isigalugu innuttaasut ulluinnarni unammillernartutut misigisartagaannik, ileqqorineqartunik, inooqataanermi kulturikkullu kingornunneqarnikunik aammalu akuerineqarsimannginnermut tunngassuteqartunik imaqarput. Innuttaasunik ataatsimiisitsinerni qulequttanik tulluartunik aammalu aaqqissuussanik assingusunik innuttaasut eqqartuisimapput. Ilaatigut qulequttat eqqartorneqartut ilagaat nakkarsaanerit nikanarsaanerillu pissusilersuutigineqartartut, oqaatsitigut ajornartorsiutit, nammineq nunagisami pisinnaatitaaffiit killilersugaanerillu, inuiaqatigiit iluanni kulturikkut assigiinngissutsit, suliffeqarfinni pissutsit, aammalu ilinniartitaanerup aaqqissuussaanera pingaarutilittut suliniuteqarfigineqartussatut eqqartorneqarput. Isummat oqaluttuallu pingaarutillit pissarsiarisimavagut, suliattalu ingerlateqqinnerani atorumaarpagut.

Isumalioqatigiissitaq ukiup ingerlanerani suliniutinik annertunerusunik pilersitsissaaq innuttaasut suli annertunerusumik peqataatinniarlugit aammalu aaqqissuussinerit oqallitsitsinertallit ilaatigut nunaqavissut aallarniisartut suleqatigalugit ingerlanneqartarumaarput. Maanna aamma oqaluttuanik ataasiakkaanik katersuineq ingerlatileruttorparput, taamaattumik inuit kaammattorpagut isumalioqatigiissitamut oqaluttuaminnik avitseqateqarnissaannik” taama oqarpoq siulittaasoq Josef Therkildsen.

 

Attavissaq:

Allattoqarfik

Mari Kleist

email: marh@nanoq.gl

oqarasuaat: 53 78 28