Oqallitsitsineq iluatsilluartoq

Saammaateqatigiinnissamut Isumalioqatigiissitap ataasinngornermi oqallitsitsinermik aaqqissuussaa “Inuiattut immikkoorutivut” Leif Saandvig Immanuelsen saqqummiisoralugu alutornartumik oqallinnermik aammalu apeqqarissaarnermik kinguneqarpoq.

Unnummi tassani saqqummiinerup imaraa, kalaallit naleqartitaat kulturilu qanoq maannakkut inuiaqatigiiusunut kattunneqarsinnaanersut.

“Inuit eqqaamasaat nalillit aallunneqartariaqarput aammalu inuiaqatigiittut ataatsimoorfigisinnaasavut nassaarisariaqarpavut. Nammineq ullorsiorfissavut tulluarsarsinnaavavut. Inuiaqatigiinnit allanit kivinneqarnissarput naatsorsuutigisinnaanngilarput, uagununa nammineq inuiaqatigiit kivittussaagipput”. Taama oqaaseqarpoq Leif Saandvig Immanuelsen.

Leifip saqqummiinera najuuttullu oqalliseqaataanerat una toorlugu tusarnaarsinnaavat.