Konferencemi immiussat

Saammaateqatigiinnissamut Isumalioqatigiissitaq iluatsilluartumik ataatsimeersuartitsinikuuvoq ulluni 1.-2. april 2017 Ilulissani, saqqummiunneqartut maanna soqutiginnittunit Saammaateqatigiinnissamut Isumalioqatigiissitap nittartagaatigut tusarnaarsinnaalerput.

Ataatsimeersuartoqarnerani malinnaasimanngitsut maanna periarfissaqalerput, ilisimasallit assigiinngitsut saqqummiussaannut tusarnaarnissaminnut. Pingaarnertut qulequtarineqarput: Saammaateqatigiinneq aamma nunasiaataajunnaarsagaaneq. Teorii, periuseq  aamma timitaliineq. Ilisimasat, kinaassuseq aamma pisinnaatitaaffiit. Nunasiaataaneq aamma nunasiaataareernerup kingorna. Oqaluttuarisaaneq, oqaluttuat ingerlateqqitat aamma teoriinik nassuiaaneq.

“Pitsaasunik alutornarluartunillu saqqummiussisoqarpoq, aamma apeqqarissaartoqarlunilu najuuttut imaqarluartumik oqallipput. Isumalioqatigiissitami tamanna siunertarisimavarput, aammali anguniarsimavarput ilisimasanik assigiinngitsunik peqataasunut aallernissarput. Ilisimasanik avitseqatigiinneq oqallinnerlu imartunerpaajupput, ilaatigut isumaliutissiissutissamut atorneqarumaarlutik”, taama oqaaseqarpoq Saammaateqatigiinnissamut Isumalioqatigiissitami Siuliuttaasoq Josef Therkildsen.       

Oqaatsit pingasut saqqummiinerni atorneqarput, tassaallutik kalaallisut, qallunaatut tuluttullu. Immiussat uani tusarnaarneqarsinnaapput: http://saammaatta.gl/kl-GL/Ilulissani-Ataatsimeersuarneq/Lydfiler-under-Konferencen-i-Ilulissat