Sumi inunngorsimanermik nalunaarusiaq saqqummerpoq

Saammaateqatigiinnissamut Isumalioqatigiissitap nalunaarusiamik saqqummersitseqqippoq, tamatumuuna sumi inunngorsimaneq tunngavigalugu akissaasersuisarsimaneq pillugu. Nalunaarusiaq Jakob Janussenimit suliarineqarpoq, maanna nittartakkut aaneqarsinnaanngorpoq.

Sumi inunngorsimaneq tunngavigalugu akissaasersuisarsimaneq aammalu suliffeqarnermi atugassarititaasimasunik imaqartoq, Kalaallit Nunaata oqaluttuarisaaneranut ilaavoq inunnut amerlasuunut attuisimasoq. Taamaattumik Saammaateqatigiinnissamut Isumalioqatigiissitamit pingaartinneqarsimavoq, qulequttap qulaajaaffigineqarnissaanik aammalu qulequttamik aqqusaagaqarsimasut immersugassiat apeqqutinik imallit aqqutigalugit peqataatinnissaat.

“Una nalunaarusiaq saqqummersitatsinnit pingaarutillit ilagaat. Isumalioqatigiissitami siunertatta ilagaat, kalaallit oqaluttuarisaanertik sapinngisamik ilisimassagaat. Kisianni aamma Kalaallit Nunaata oqaluttuarisaanera kalaallit namminneq oqaluttuaat aallaavigalugit allanneqassasoq”, taama oqaaseqarpoq Saammaateqatigiinnissamut Isumalioqatigiissitami siulittaasoq Josef Therkildsen.

Ima aamma Jakob Janussen oqaaseqarpoq,

“Qulequtarineqartup oqaluttuarisaanera nalunaarusiami allaaserineqartoq, 1960-ikkut qeqqaniit ukiut 30-it siumut tamanna piusimasoq. Misissueqqissaarnermi nalilersuinermilu qitiupput immikkoortitsinerup inuiannut kalaallinut aammalu inuiaat danskit kalaallillu akornanni pissutsinut arlalippaalussuarnut sunniutigisai”.

Sumi inunngorsimanermik nalunaarusiaq “-naligiissitaalivinnissamik noqqaaneq paarlattorluinnaanik inernilerneqarpoq”-mik qulequtaaralik Saammaateqatigiinnissamut Isumalioqatigiissitap nittartagaanut http://saammaatta.gl/~/media/Forsoningskommission/ForsoningsKommissionen/Files/Fødestedskriteriet%20endelig%20GL.pdf-imut aaneqarsinnaavoq.

Paasissutissat annertunerusut pillugit attavigiuk:

Saammaateqatigiinnissamut Isumalioqatigiissitap allattoqarfia

E-mail: molm@nanoq.gl

Oqarasuaat 55 98 01