Isumalioqatigiissitaq ataatsimeeqqammerpoq

Isumalioqatigiissitami ilaasortat

Saammaateqatigiinnissamut Isumalioqatigiissitaq sapaatip akunnerata naanerani qulissaanik ataatsimiippoq. Isumaliutissiissutissami innersuussutissat sammineqarput, ukiup naanerani Naalakkersuisunut Inatsisartunullu tunniunneqartussaasut.

Ukiut pingasuni sulinissap naggataa aallartippoq, suliniutit kingulliit ukiami naammassineqassapput isumaliutissiissutissarlu suliarineqarpoq. Ataatsimiinneq imaqarluarpoq, suliniutit kingulliit inissinneqarlutik. Pingaarnerpaasimavoq isumaliutissiissutissaq, imarisassamigut salliutinneqartussaallutik innersuussutit iliuusissatullu pilersaarutit, innuttaasut oqariartuutaat innersuussutaallu tunuliaqutaallutik suliarineqartoq.

“Sulinitsinni inuiaqatigiit pingaarnerpaajujuarnikuupput, innuttaasummi nunaqavissut inuunerminnik inuunerminnilu atugassarititaasunik ilisimasaqartuupput. Oqallinnernik aallartitsisimavugut siornatigut eqqartorneqartarsimanngitsunik, inuiaqatigiillu ingerlariaqqinnissaminnut tamanna pisariaqartippaat”, taama oqaaseqarpoq Siulittaasoq Josef Therkildsen.

Suliniutit naammassineqareersut nittartakkami www. saammaatta.gl-imut aaneqarsinnaapput.

Asseq. Allattoqarfik: Saamimmiit. Siulittaasoq Josef Therkildsen, Siulittaasup tullia Dorthe Katrine Olsen, Ataqqinaammik ilaasortaq Karla Jessen Williamson, Ilaasortallu Ida Mathiassen aamma Îsâvaraq Petrussen.